海綿

呢排啲時間多左，多到唔知點去利用！最近都好早收工。收工就返屋企。上網、MSN、聽歌、睇動畫！都少左出街。期待已久嘅朝九晚五嘅生活，終於都來臨！不過原來得到一啲野，就必須失去一啲野！最近又開始胡思亂想，不斷發夢，沉醉於夢裡面嘅世界。
尋日發左一個夢，夢中我同小貓一齊，去左一個好靚嘅海灘！我同小貓都响呢個海灘玩得好開心！好想呢個夢可以繼續落去！不過夢與現實始終都唔會相同！
返到現實嘅世界，都係要俾心機做好份工先得！今日可能因為天氣都幾熱，出汗量超乎想像！竟然可以係一滴一滴咁流出嚟！好似成個人變左一舊充滿水嘅海綿，用力一揸，就可以將啲水揸晒出嚟！認真誇張！嘩卡卡卡~

Read more

懷念…

突然間，好懷念以前嘅生活！懷念小時候讀幼稚園嘅我、懷念以前間屋、懷念只有細個嗰陣先食到嘅吹氣糖、懷念以前屋企樓下個公園、懷念啲玩具、懷念海洋公園個水上樂園、懷念以前教過我嘅呀sir，miss、懷念已經拆左嘅荔園…好多好多嘅回憶，但已經唔會再重現眼前！
最近都懷念兩個人嘅生活！人點解經常做啲咁矛盾嘅事？當一個人嘅時候，就想同另一個人一齊生活！但當可以兩個人一齊，又好想有一個人嘅時間！好想簡簡單單咁過生活，又想同身邊嘅另一半分享苦與樂！

Read more

回憶…

醒啦！起身啦！要返去現實嘅世界啦！呢個夢要完啦！
既然有一段美好回憶，就要好好去珍惜！每一刻，每一個晚上，每一個畫面，我都唔會忘記！呢段記憶帶俾我嘅歡樂，俾我幸福嘅感覺，溫馨嘅時間…雖然唔甘心，但始終要去做一個決定！前面重有要行嘅路，我會好好咁行落去，我要為將來能夠再次得到呢一份幸福而努力！

Read more

分享

我其實應該要做啲咩呢，俾左自己一個目標，五年內完成！但我好想同佢分享，我知道，呢個係一個等唔到嘅機會，但我真係唔想輕易放棄！點解要咁執著？無法令自己抽身，好想分享我嘅一切！呢段日子，我好珍惜响佢身邊嘅時間，一個屬於我同佢嘅空間！每一刻都係我美好回憶！

Read more

溫馨感覺

7月4日  (陰)
尋日公司唔知點解無咩單做，好早就收左工。返到屋企同小貓 傾左一陣msn。之後我岀左去等小貓放工，送左小貓返佢屋企！唔知點解，每次送小貓返屋企，都有一種溫馨嘅感覺。小貓好安靜地坐响我後面，雙手放响我膞頭 上，間中响燈位停車時，我都會回頭望望小貓，小貓會向我微笑。有時小貓會做下鬼面，十分可愛。送到佢屋企樓下，我攞左份禮物送比小貓，之後佢返上樓！我就 响附近行左一陣。
小貓食完晚飯，打左個電話俾我，話落樓陪我傾計。最初我地坐左响樓梯，傾左一陣，之後轉左去附近嘅公園裡！响公園裡，我周 小貓坐响滑梯嘅平台上，伴隨著清風吹來，感覺好舒服！我同小貓都享受住呢份清風！感覺同小貓嘅距離好近，心想好希望可以將呢一刻停住。望住小貓，有一種幸 福嘅感覺！
小貓好鍾意份禮物，我好開心！呢份禮物係我用左好多心機去挑選，呢份係我送俾小貓嘅第二份禮物！好想成為小貓嘅依靠，

Read more

給我時間

最近又開始中返可樂毒，返工司機時不時就會去買可樂請我飲！返到屋企，冇野做，屋企又冇野飲，又落7仔買！再咁樣落去，我個減腩計劃就會失敗！唔得，一定要戒甩佢先得…！又開始勁煲煙，返到屋企一冇野搞就煲煙，對可樂，咁嘅生活點搞好？
已經有一個星期無見過小貓，以後唔知會有幾多時間搵小貓！好想見，唔想留响呢間房，開始討厭呢間房，感覺呢個空間唔屬於我！

Read more

感覺

6月14日  (雨)
今日返工，知道頭頭出左院返嚟！我第一時間去左搵佢！哈 哈！唔係去問候下佢，而係去同佢講，想學下執貨，頭頭同我講幫我安排！其實執貨又有幾難吖，最重要想搵多個錢去完成我嘅理想。最近有好多事都會同小貓講， 包括呢件事！我本來想再做多一份part-time，不過小貓話，如果真係轉左部門，就唔好做多份！咁辛苦！咁又係，到時份人工就會多過依家。
今 日又同小貓msn，每日都同佢msn，雖然都係工作時間玩，但係大家都冇阻礙大家嘅工作，感覺幾好！但係如果遲啲真係轉部門，就會同小貓少左msn，到時 又會點呢？今日小貓同我講，佢好鍾意我幫佢起呢個名，聽到佢鍾意我都好開心。呢個名我本來係唔想俾人知佢嘅真正身份而改！(本來都唔想小貓知！)不過既然 俾佢發現左呢個秘密地方，就無辦法啦！呢個名，我諗左好多晚，對我都有一個特別意思！
好多事情都放唔低，過去、現在、將來，每一件事都對我 好重要！過去嘅，變成回憶嘅一部份！間中閃出嚟，感覺已經轉淡！現在嘅，開心、痛心、掛心…百感交集，從來未試過有咁強烈嘅感覺，唔通，人到某段時間，都 會有轉變，我依家應該放手，定再等機會？想放手，但……！將來嘅，好想靠自己去改變，咩都玩夠喇！唔想以後嘅日子，仍然好似依家咁！好想俾最好嘅野俾另一 半。我會做好我自己，我會得到我嘅將來！

Read more

編織一個家

突然好想好想結婚！其實都唔係突然，兩年前已經好想，但係未儲到老婆本！依家，得返一個 人…！好朋友一個個地結晒婚，見佢地都有個終生伴侶，實在好羡慕！雖然好想結婚，但係我唔會隨便搵一個人去結。人大啦，係時候要做大人嘅野啦！家姐都結埋 緍有埋小朋友！我依家係個舅父喇！舅母响邊呀？心中有一個人選，但係……！我唔係為結婚而結婚，我好想我嘅另一半得到幸福。好想編織一個溫馨嘅家！呢一 刻，我要努力，儲返個錢，做個好男人、好老公、好爸爸…！

引用(0)

Read more

你好嗎？

今日無返工！响屋企同小貓msn！小貓仍然放唔低，仍然掛住佢bf！佢嘅心情，我好明白！明明相愛，點解會變成咁！睇見佢不斷自責，我都覺得心痛！好想去 陪住佢！好擔心小貓！响電話中，聽到佢嘅喊聲，個心好酸！點解可以做到呢種地步？我可以做啲咩？我真係唔識開解佢，明白佢心情又有咩用？好想好想小貓打個 電話俾我，同我講 " 我無事啦！"

Read more

秘密？

原來，呢個地方已經唔係一個秘密！原來，小貓已經發現左我開左呢個blog！
今日嘅工作唔算忙，有時間同小貓msn，傾左一陣！小貓 突然同我講，佢睇個呢個blog！嗰一刻我呆左！心諗，點解佢會知？真係上次放錯連結，咁啱俾佢連左上去？原來，我唔記得我同佢講過，我另外有個 blog！不過我都同小貓表白左，我遲早都會俾佢睇，遲早佢都會知！希望唔會有其他fd睇到！我冇同任何人講過呢個blog嘅存在，如果真係有人發現，咁 都冇辦法！不過我諗我要改過個名先得！

Read more

欲言又止

6月9日  01.35a.m.  (雨)
啱啱同小貓傾完msn，知道小貓又 同bf嘈！今次小貓話同佢bf講分手，我聽到有啲開心！但係，小貓不停話佢bf嘅不是，我知道件事係未完全解決！感到有啲失望！本來想同佢講我鍾意左小 貓，但係，我到最後都無講到！我怕唔知佢會有咩反應！當我講笑？定係會無fd做？又或者接受我？我唔敢搏！我唔肯定小貓講分手係一時之氣定係好有決心！我 怕我會失去依家嘅關係！我要做啲咩好呢？聽日我放工會去佢嗰邊，我應唔應該同小貓表白呢？我無信心！呢幾日都為呢件事煩惱！一個人去吹風。
呢一刻好想佢地分手，好黑心！

引用(0)

Read more

家

家，一個幸福嘅家，有爸爸、媽媽、兄弟姊妹。爸爸有穩定工作，工作過後，回家與妻兒食下晚飯，傾下計，大家開開心心過每一天！
我 有一個家，可惜，係一個破碎嘅家！一個感覺唔到溫暖嘅家！一個失望嘅家！自小父母離異，最初，我跟隨我爸爸生活！爸爸為要照顧我，早晚都要工作。雖然，經 常一個人，但仍然感到溫暖，因為重有爸爸嘅關心！直到爸爸帶左另一個女人回家，雖然如此，我爸爸對我依然未變！雖然我唔鍾意呢個女人！但呢個仍然係我嘅 家！
讀完小學，我就要跟我媽媽生活！直到現在，我對呢一個家，已經無晒感覺！一個無家嘅感覺嘅家！曾經離開過兩次，回頭又只得失望。好想再離開呢個家！呢個家影響得我太深！响呢個家，我望唔到我嘅將來。影響我組織屬於我嘅家！

Read more

迷失…

最近發覺自己變得好奇怪，明明知道有啲事心急唔嚟，但又控制 唔到自己。有啲事諗極都諗唔明，鍾意一個人，真係可以咁盲目？無論佢點令對方失望，都可以為佢做任何事！無論點唔理會佢身邊人，都仍然陪伴左右？突然發 現，自己因為某件事情，迷失左自己，失去左邏輯思考！雖然未做到令人討厭嘅地歩，但人應該要响適當嘅時候，做適當嘅事。响呢個moment，作為一個浪子 嘅我，唔可以再咁樣沉淪落去！要為自己將來努力，計劃好要做嘅事，唔可以再亂左自己陣腳。
究竟，佢依家用咩心態去同佢個bf一齊？究竟為咩要堅持到依家？明知改變唔到嘅結果，明明自己已經到極限……！

Read more

發惡夢

唔知係咪尋日飲過酒先訓嘅關係！今朝早竟然發左個惡夢！六點幾就嚇醒左，一烚埋眼，又見番個夢！我夢見有一個女仔坐左响一 張電腦椅，响條馬路上行緊！我當時開緊我架電單車，好奇之下，我駛埋去望下！發現原來我識得佢，於是我問佢，"點解佢坐住張電腦椅行馬路咁危險?"佢就話 佢等唔到車所以咁做！我就同佢講"不如我車你返屋企啦"，跟住佢就放低左張電腦椅，上左我車！之後我經過一間電器舗，咁啱報導緊一單交通意外，意外嘅主角 係一個少女，發現原來係我身後嗰個朋友！當時我都幾驚！停左車，我望左佢一陣，見佢好似有野想同我講，但我身體寒一寒就醒左！望一望個鐘，已經六點幾，諗 住訓多一陣！烚埋眼又見到佢. . . . ！好驚，真係好驚！

Read more

信是有緣

估唔到，緣份呢種事情會發生响我身上！大家無約定嘅情況下，互相碰面！
今日， 我如常返夜學！心想：不如打個電話俾佢！諗住同佢講，今晚可能無時間玩msn！當接通左佢個電話，知道原來佢都响尖沙咀時，我心裡十分開心。原來佢一星期 前已經約左朋友食飯！於是我約佢放學後見面。心中希望快啲放學就好！終於到左放學，我約佢响九龍公園見面！搵左一個比較靜嘅地方傾計！知道佢仍然為佢嘅 bf苦惱，我亦都試著安慰佢！傾左大約一個鐘，我建議轉個地方！於是，我地去左海傍繼續！奇妙嘅事情，再一次出現！我地傾左一陣，突然身後有個婆婆揸萫一 個花，响我地兜售！最初，無打算買，其後我決定買一支送俾佢！見佢收到呢支花嘅表情，自己都暗地歡喜！我地一直傾到一點幾，之後送佢返屋企。
今晚，真係好開心。希望有一日可以以bf嘅身份，再一次到海傍，回想今日嘅情景。

Read more

究竟知唔知呢？

尋日有個朋友同我講，佢話"你嗰Blog寫成咁，係人都知咩事喎！"  o.O"  本來唔係想咁嘅，我似乎錯手放錯左連結，點算呢？好擔心俾佢睇到呢段說話！呢兩日，發覺佢不停暗示左好多野，如果佢真係睇到，會唔會咁而避開我呢？我唔想事情變成咁！希望佢睇唔到啦！
今日又九點幾鐘起左身！早幾日因為執屋，唔小心剪錯左用來睇電視嘅天線！搞到有幾日無得睇電視！終於搞掂條天線，可以睇"溏心風暴"結局篇。上集大鮑真係大快人心；"我可以分五千萬俾你……再搞事一毫子都無……四千萬、三千萬、……"型呀！

引用(0)

Read more

永遠地……

5月26日   (陰)
今 日同佢傾左好耐，同佢傾計真係好開心！好舒服！咩都會講！响佢嘅世界可以好輕鬆。但似乎我唔可以再深入佢嘅世界，我知道佢好愛佢嘅另一半，為左佢咩都可 以！我都唔想破壞佢地嘅感情。所以我決將呢份心意永遠埋藏响心裡面！繼續維持好朋友關係！寧願擁有呢個好朋友，都唔希望失去一個好朋友！我可以做嘅應該只 有呢件事！
先做好要做嘅事，總有一日，我應該得到我想得到嘅！現在要將感情回路暫時關閉~~！

Read more

期待嘅滋味

新Blog開幕！
點好呢？今日嘅假期浪費左半日！朝早唔知點解一大早就醒左，眼光光望住天花！終於啲起心肝去執下間房！
執完房，望下個msn，心想"唔知佢訓醒未呢？"
好耐無試過有呢種感覺！等嘅感覺、期待嘅感覺！記得中學時都試過呢種感覺嘅滋味！既苦且甜。其實直到依家，我唔肯定我呢個感覺係真實，定係一個假象，但一見到佢online，我就會好開心，同佢談天說地！但當佢off時，就好唔捨得，只有期待下一次會面！
上次佢唔開心，我一直都陪住佢！見佢喊，我好想攬住佢！但最後都係唔敢！因為我知唔應該响呢個時候咁做。雖然好想佢明白我嘅心意，但暫時唔可以！呢一刻只有等待！唔知佢點諗呢？
我應唔應該同佢講我嘅心聲呢？

Read more