毫無疑問，打WAR GAME的確係一項危險嘅活動。始終，呢項係擬似戰爭遊戲，參與嘅朋友，都需要携帶氣槍或電動槍，進行射擊。不過，若然能夠做足安全措施，那怕此活動危險？再者，進行活動嘅同時，亦會有導師在場，若閣下安全設備不足，你想參與都幾難！最起碼，一定要有安全面罩或護眼罩、護肘、護膝......等。有以上物品都唔係話一定百份百安全，不過一定有保護作用。
我知道，有好多人都誤解WAR GAME嘅目的；好多人都認為，打WAR GAME嘅人都係好戰份子、危險人物、壞孩子...等。認為呢類人都只識用『槍』射人，傷害人，好戰暴力！我唔否認，當中有呢類人嘅存在。但係，並非所有人都係咁。其實，WAR GAME並非想像般危險，活動當中都需要遵守一D遊戲規則，例如：參與活動者必須配帶面罩或護眼罩、响戰區範圍附近不能除下面罩或護眼罩、响死人區或休息區不可開槍...等等！參與者內都有一D不明文嘅規定：槍頭不可指向人、戰鬥時太接近要避免開火，以『BINGO』示意、中槍者必須舉槍示意為已死、中一槍或規定多少槍死，死人必須離開戰區...等等。
打WAR GAME雖然有一定危險性，只要大家都遵守一D規則去玩，危險都相對地降低；我個人認為，WAR GAME中都有可以領悟、體會嘅事情，並非單單你射我！我打你！當中可以學會團隊精神，學會耐性，學會個人嘅修為，一D社會上未必學會嘅事情。打WAR GAME中彈受傷，時有發生，亦在所難免。除非閣下自認技術超然，能避開所有攻擊，戰勝所有敵人！不過，再高技術嘅師兄，都有被人打中嘅時候。除非你只識躲避，並無進攻意識；咁不如留响屋企打機玩飛卜，做個足不出戶嘅『宅人』算喇。
其實，有邊類活動會保證百份百安全？跑步有機會跌傷撞倒、打波又係會撞傷扭傷、踩單車一樣會撞傷，有D叫落山單車都一樣危險，BBQ都有機會燒傷，游水都會遇溺！不過若果閣下做好準備功夫，自然可以減低受傷嘅機會。我天生好動，要我乖乖坐定定？確實係件難事！想安全？你嘅準備足夠嗎？
